ربط جهاز البصمة ZKTeco بنظام كونكت

الربط بياخد حوالي 5 دقايق، ومحتاج حاجتين: كمبيوتر في المكتب متوصل بنفس شبكة جهاز البصمة (ويندوز 10 أو أحدث، أو ماك 12 أو أحدث)، وحسابك على نظام.

1. هات كود الربط من نظام

1. ادخل نظام، وافتح إعدادات الشركة ← الأجهزة.
2. تأكد إن ZKTeco هو المختار.
3. اضغط + ربط جهاز جديد (أو ابدأ ربط جهاز لو لسه مفيش أجهزة).
4. هيظهرلك كود من 6 أرقام.

2. نزّل نظام كونكت

على كمبيوتر المكتب، نزّل البرنامج من صفحة التحميل أو من زرار ويندوز / ماك اللي جنب الكود، وثبّته.

3. اكتب الكود واربط

1. افتح نظام كونكت واكتب كود الربط المكوّن من ٦ أرقام، واضغط متابعة.
2. هيظهرلك اسم شركتك: لو صح، أكّد.
3. البرنامج هيدوّر على أجهزة البصمة في الشبكة. لو جهازك مظهرش، تقدر تكتب عنوان الـ IP بتاعه بإيدك.
4. اختار الجهاز واضغط اربط الأجهزة المختارة.
5. استنى الخطوات تخلص لحد ما يظهر تم الربط!. الجهاز بيعمل إعادة تشغيل مرة واحدة أثناء الربط.

وانت بتربط، شاشة نظام بتتحدث لوحدها كل 3 ثواني: «مستنيين البرنامج» ثم «البرنامج اتصل» ثم «تم ربط الجهاز».

البرنامج بيعمل إيه في الجهاز؟

• بياخد نسخة من إعدادات الجهاز قبل أي تغيير.
• مش بيمسح أي موظف أو بصمة من الجهاز.
• بيرفع الموظفين والبصمات القديمة اللي على الجهاز مرة واحدة.
• بيضبط الجهاز يبعت البصمات لنظام على طول.

بعد الربط مش لازم الكمبيوتر يفضل شغال: الجهاز بيبعت البصمات لنظام لوحده.

الدعم عن بُعد (اختياري)

بعد الربط، البرنامج بيسألك لو تحب تسيبه شغال عشان فريقنا يقدر يساعدك عن بُعد. لو وافقت:

• البرنامج بيشتغل مع تشغيل الكمبيوتر.
• لو الجهاز وقف يبعت بصمات، البرنامج بيسحبها منه ويبعتها كل 15 دقيقة.
• الدعم يقدر يشوف الشبكة وإعدادات الجهاز المسموح بيها بس، مش شاشتك ولا ملفاتك.

تقدر توقفه أو تشغّله في أي وقت من قائمة ⋯ في البرنامج.

مفيش كمبيوتر على نفس الشبكة؟

في نفس شاشة الكود، اضغط مفيش كمبيوتر على نفس الشبكة؟ الإعداد اليدوي. هيظهرلك عنوان السيرفر والبورت (80): اكتبهم في إعدادات Cloud Server أو ADMS في قائمة الجهاز، وبعدها اضغط أنا خلصت، استنى الجهاز. نظام بيستنى الجهاز يتصل لمدة 30 دقيقة.